Alla Itolae Nusa 2

Hoko nusare kai pusue yelu kena esi laleije Itolae pela peneka. Kena petu iture Alla Eni makerike pela peneka, eleki Iplei. Hoko Iono misete kena petu itu mere kai Iono petu mere tebikele, le kena petu mere pine Iplei bei Eni makerike. Alla Itolae nusare kai pusue yelu kena esi laleije ele mere.

[tolong lihat ayat sebelumnya]

[tolong lihat ayat sebelumnya]

Lanite kai tapele etola menaije ele mere.

tnanele kwawi sasaisa ekusu mei nusa mosa kai tnanele kena tapele sae mosa, le TUHANE Iono ulane tetu mei nusa mosa kai tamata kena andinuke tapele mere sae mosa.

Po bubute sa bei mpe tapele lolete kai eambosike pusue nusare.

Kena mere TUHANE Alla Irana tapele toto kai Iono lupe tamata eleki Inasi kena tamata mere inuije leke inasi, eleki tamata mere ikwana.

Eleki TUHANE Alla Iono ndinu me Edene, me sapleuke lemataije sare. Ete mere pine TUHANE Alla Itolae tamata rebe Ionoi bei tapele.

TUHANE Alla Iono tnanele sasaisa neka ekusu kena ndinu mere. Tnanela meru selulu nteki kai esi buaiju mise kena kanele. Kai me ndinu mere esi tlaije Iono ai aini rebe eono tamata irue eti pela kai ai aini rebe eono tamata irekwa misete kai tiare.

Kwele sae erala bei Edene kena eambosike ndinu mere, kai esiri bei mere, elarake kena sanai ata.

Kwele sanai nomore esare esi nane Pisone; sanai mere ekeue otoi Hawila.

Kai mase ete mere misete. Ete mere tanei boini ntelete rebe esi nane bedolare me, batu rebe esi belini elake rebe esi nane krisoprase me.

Kwele sanai nomore luare esi nane Gihone, rebe ekeue pusue otoi Kuse.

Kwele sanai nomore telure esi nane Tigrise, ekeue otoi Asure esi sapleuke lemataije sare. Kai kwele sanai nomore atare esi nane Eprate.

Eleki TUHANE Alla Itolae tamata mere me ndinu me Edene leke ikerike loko ndinu mere kai irakae.

Eleki TUHANE Alla Iriluke pleta ete tamata mere be, “Pusue aia mei ndinu meije esi buaije akanele yele,

batuke aini rebe eono tamata irekwa misete kai tiare esi buaije akane yake. Sepo akanele hoko bei pitoini mere neka namake amata.”

Eleki TUHANE Alla Ibeteke be, “Mise mo, sepo tamata mere ruai. Au ono eni maka tapa sae rebe panuhu kaini.”

Eleki TUHANE Alla Irana tapele toto kai Iono tapele mere eono binatane sasaisa neka rebe unda kmalane kai rebe undete teture. Eleki Alla Ikerilu loko tamata mere leke tamata mere iselulu kai iono binatana meru esi nane. Hoko binatana meru usupu nane papelakelu memenaije bei mere.

Tamata mere iono nane ete pusue binatana rebe unda kmalane kai rebe undete teture, po bei pusulu, sae eono maka tapa rebe panuhu kaini mo.

Eleki TUHANE Alla Iono tamata mere intulu tlebei titinai, kai kena intulu sare, TUHANE Alla Isirie tamata mere eni lusukwalai sae eleki Itolae tinai kena esi lakwaije.

Kai TUHANE Alla Iono tamata bina sae bei lusukwalai mere, eleki Ikerini loko tamata mere.

Hoko tamata mere iombe, “Imeije! Tamata rebe isakesa kai aure imeije. Eni luline bei lulikue, eni tinaije bei tinakue. Au ono eni nane bina le ranai bei mokwai.”

Bei mere hoko tamata mokwaije ikeu bei amai kai inai, kai ilupu kai eni bina, eti luaise esa.

Mokwai kai bina mere luasi kalaku po luasi asomi mo.